Tuga er saknað eftir ruslskriðu á Filippseyjum
Samúel Karl Ólason skrifar 9. janúar 2026 16:00
Að minnsta kosti tveir eru látnir og 36 er saknað eftir að fjall úr rusli og braki hrundi yfir sorpvinnslustöð á ruslahaug á Filippseyjum.
Flóð rusls og braks flæddi yfir hús og eru margir sagðir hafa lokast inni.
Þrettán var bjargað í nótt en einn þeirra lést í.
Allir þeir sem eru látnir eða er saknað störfuðu í sorpvinnslustöðinni.
Björgunarsveitir voru að störfum við að reyna að grafa fólkið út í dag, samkvæmt AP-fréttaveitunni.
Er notast við stórar vinnuvélar til að leita að fólkinu á meðan fjölskyldur þeirra sem saknað er fylgjast með.
Samkvæmt starfsmanni sem rætt var við hrundi ruslfjallið skyndilega og í góðu veðri.
Jaylord Antigua var á skrifstofu sinni þegar rusl flæddi þar inn en honum tókst að skríða gegnum ruslið og sleppa úr húsinu.
„Ég sá ljós og skreið í áttina að því í flýti, því ég óttaðist frekari skriður,“ sagði Antigua.
Ruslahaugar sem þessir hafa lengi valdið áhyggjum víðs vegar á Filippseyjum, bæði vegna skorts á öryggi og vegna mögulegrar mengunar.
Árið 2000 hrundi stærðarinnar haugur af rusli yfir kofabyggð í úthverfi Manila, en þá hafði veður verið vont í nokkra daga.
Eldur kviknaði í skriðunni og rúmlega tvö hundruð manns létu lífið.
Heimild: Er svo. Samúel Karl Ólason. Vísir
Skráning: Friðrik Kjartansson
Yfirlestur: malfridur.is (Málstaður)
