Kostnaður loftslagsaðgerða bitnar á almenningi með óbeinum hætti
10. nóvember, 2025 – 11:00
Frosti Sigurjónsson, fyrrverandi alþingismaður, gagnrýnir harðlega þá stefnu sem íslensk stjórnvöld hafa sett sér í loftslagsmálum.
Í nýjum þætti Spjallsins með Frosta Logasyni á Brotkast heldur hann því fram að aðgerðir Íslands í samdrætti á losun gróðurhúsalofttegunda skili engum raunverulegum árangri á heimsvísu, en valdi hins vegar verulegum kostnaði sem leggist á heimili og fyrirtæki í landinu.
„Ísland gæti hætt allri losun án þess að það hefði áhrif á loftslagið“
„Við losum um 0,01% af losun heimsins,“ sagði Frosti. „Ef við myndum hætta að losa á morgun og aldrei losa meir, þá hefði það engin mælanleg áhrif á loftslagið.“
Hann segir að markmið stjórnvalda virðist ekki fyrst og fremst vera að ná mælanlegum árangri, heldur að „sýna liðsheild“ og skapa sér ímynd á alþjóðavettvangi.
„Við hvert 1% sem neysluvísitalan hækkar hækka skuldir heimilanna um 20 milljarða.“
Hann bendir á að Ísland hafi þegar dregið mjög úr losun fyrir aldamót, meðal annars með rafvæðingu og uppbyggingu hitaveitna, og spyr hvers vegna stjórnvöld telji nauðsynlegt að ganga enn lengra en aðrar þjóðir.
Segir kostnaðinn hlaupa á tugum milljarða árlega
Samkvæmt svörum sem Frosti vísar í, og koma frá stjórnvöldum, nemur kostnaðurinn við að uppfylla núverandi loftslagsmarkmið um 20 milljörðum króna á ári, eða yfir 250 milljörðum króna yfir áratugatímabil.
„Þetta eru eitt til tvö sjúkrahús,“ segir hann og bætir við að þessar upphæðir skili engu neinum mælikvörðum í loftslagsmálum.
Hækkun gjalda leggst á heimili landsins
Í seinni hluta viðtalsins fjallaði Frosti sérstaklega um leiðir stjórnvalda til að draga úr losun, þar á meðal kolefnisgjöld á flug, skip og eldsneyti.
Hann segir að slík gjöld hækki verð á öllum vörum sem fluttar eru til landsins, sem og kostnað við bíla- og flugsamgöngur.
Þetta leiði til hækkunar á neysluvísitölu og þar af leiðandi hækkunar á verðtryggðum lánum.
„Við hvert 1% sem neysluvísitalan hækkar hækka skuldir heimilanna um 20 milljarða,“ segir Frosti og bendir á að það bitni sérstaklega á ungu fólki á húsnæðismarkaði.
Fullyrðir að losunarbókhald sé rangt
Frosti hélt því jafnframt fram að nýjustu rannsóknir sýndu að íslenskt gróður- og beitiland taki upp meira magn koltvísýrings en íslenskur iðnaður losar.
„Þetta er ekki tekið inn í reikningana,“ sagði hann, og kallar það óskiljanlegt.
„Þetta eru ekki vísindi, þetta er áróður“
Að lokum gagnrýndi hann það sem hann kallar „styrkjaumhverfi“ loftslagsrannsókna.
„Þeir sem komast að ‘réttum’ niðurstöðum fá styrkina,“ sagði hann, og hélt því fram að vísindamenn sem dragi í efa algeng viðhorf í loftslagsmálum fái ekki sama aðgang að fjármögnun eða frama.
Hægt er að sjá brot úr viðtalinu hér að neðan en ef þú vilt sjá allan þáttinn geturðu tryggt þér áskrift að Brotkast.is hérna.
Heimild. Er svo: Nútíminn 10. nóvember, 2025 – 11:00
Skráning: Friðrik Kjartansson
Yfirlestur: malfridur.is (Málstaður)