2025: Úthöfin aldrei hlýrri – Línulegur vöxtur síðustu 30 árin
Einar Sveinbjörnsson
Úthöfin eru helsti varmageymir jarðar.
Þau taka upp meira en 90 prósent af þeim umframvarma sem aukin gróðurhúsáhrif valda.
Hiti heimshafanna er því lykilvísir um langtímabreytingar á loftslagi.
Myndin er fengin úr rannsókn tuga vísindamanna við fjölmargar stofnanir.
Birtist í gær, föstudag, í Advances in Atmospheric Sciences.
Heildaraukning varmans í úthöfunum á síðasta ári nam 23 Zetta-Júlum (23 ZJ) – eining sem eðlilega fæstir skilja! – en samsvarar meira en 200 sinnum allri raforkunotkun jarðarbúa á ári.
Í frétt um málið segir einn höfunda greinarinnar, bandaríski loftslagsvísindamaðurinn Kevin Trenberth, að
hlýnun efstu 500 metranna í hafinu hafi verið greinileg allt frá því seint á áttunda áratugnum.
Manngerður varmi, sem er innsk. vitanlega kominn frá sólinni upprunalega, nær nú niður á allt að 2.000 metra dýpi.
Kevin segir að mælingar sýni að það taki um 25 ár fyrir þennan umframvarma að berast niður á slíkt dýpi.
Þar varðveitist hann og mun sennilega gæta áhrifa um aldir.
Hin myndin sýnir yfirborðshita sjávar 2025.
Takið eftir því hvað heitt var í Norður-Kyrrahafi, enn eitt árið.
Frávikin frá meðaltali 1981-2021 eru allt að 3,0°C.
Kalda svæðið við miðbaug skýrist hins vegar af La-Nina, eða kaldsjávarfrávikum ENSO þetta árið.
Hlýnandi sjór í N-Kyrrahafinu veldur m.a. breytingum á hitafallandanum frá miðbaug til pólsins.
Og það orsakar að kjarni hinnar miklu vestanvindrastar (skortvindsins) á þessum slóðum í 6-9 km hæð hefur færst norðar.
Það hefur aftur áhrif á Rossby-bylgjurnar yfir N-Ameríku og N-Atlantshafi.
Þar með veðrið hér hjá okkur.
Þessi
brúun
í loftstraumununum á milli Kyrrahafs og Atlantshafs er einmitt mikilvægt svið veður- og lofslagsrannsókna um þessar mundir.
Tengill í fyrstu athugasemd á greinina: Ocean Heat Content Sets Another Record in 2025.
Heimild: Loftslagsbreytingar – umræða og fréttir Stjórnandi Ari Finnsson Facebook
Skráning: Friðrik Kjartansson
Yfirlestur: malfridur.is (Málstaður)